لاہور۔5اگست (اے پی پی) وزیر اعظم محمد شہباز شریف آکھیا جو میرٹ تے شفافیت دے بغیر کہیں وی شعبے اچ ترقی ممکن کائنی، جلدی کھیݙاں دے میدان اچ ونڄیا ہوئیا مقام ولا ڳھنسوں، کرکٹ اسٹیڈیمز کوں جدید ٻݨاوݨ دی لوڑھ اے۔ حکومت کھیݙاں دے ودھارے کیتے وسائل لیندی پئی اے۔ اے ڳالھیں انہاں سنوار کوں قذافی اسٹیڈیم لاہور دی نویں سروں تعمیر دے منݙھ بدھݨ دی تقریب توں خطاب کریندیں ہوئیں آکھی۔ ایں موقع تے وزیر داخلہ و چیئرمین پی سی بی محسن نقوی،وفاقی وزیر اطلاعات و نشریات عطا ءاللہ تارڑ،سپیکر پنجاب اسمبلی ملک احمد خان،سینئر صوبائی وزیر مریم اورنگزیب تے ٻئے رہنما موجود ہن۔ وزیر اعظم محمد شہباز شریف آکھیا جو حکومت کھیݙاں دے ودھارے کیتے کم کریندی پئی اے۔ ۔محمد شہباز شریف ماضی دا حوالہ ݙیندیں ہوئیں آکھیا جو پنڄاہ توں اسی دے ݙھاکے تئیں کھیڈاں دے میدان اچ اساݙی ٹیماں دا طوطی الیندا ہئی، پر بدقسمتی نال سفارشی کلچر کھیݙاں سودھے ٻئے شعبیاں دا ٻیڑہ غرق کر ݙتے۔ میکوں خوشی اے جو چیئرمین پی سی بی محسن نقوی قذافی اسٹیڈیم دی تعمیر نو اتے انفراسٹرکچر کوں جدید ٻݨاوݨ بارے کم کیتے۔ اے منصوبہ وی جلدی پورا کریسوں۔ وزیراعظم محمد شہباز شریف محسن نقوی کوں مخاطب کر تے آکھیا جو جینویں تساں قذافی سٹیڈیم دی تعمیر نو کریندے پئیو اینویں قومی ٹیم دی وی تشکیل نو کیتی ونڄے۔ کرکٹ تے خصوصی توجہ ݙتی ونجے۔ انہاں آکھیا جو ٹیم اچ کھݙاریاں دے چݨاؤ اچ کہیں سفارشش کوں نہ منیا ونڄے بھانویں وزیراعظم کیوںنہ سفارش کرے۔ صرف میرٹ کوں اُتے رکھیا ونڄے کیونجو سفارشی کلچر دے خاتمےنال کرکٹ، ہاکی سودھی ٻئی کھیݙاں اچ ملک دا ولا ناں اُچا کیتا ونڄ سڳدے۔ میکوں امید اے جو اساں جلدی کھیݙاں دے میدان اچ آپݨا ونڄیا ہوئیا مقام ولا ڳھنسوں۔
