اسلام آباد۔27اگست(اے پی پی) نائب وزیراعظم و وزیر خارجہ سینیٹر محمد اسحاق ڈار آکھیے بلوچستان پاکستان دا اہم صوبہ اے، ماضی اچ اساں دہشت گردی ختم کیتی تے ملک کوں معاشی طورتے طاقتور بݨایا، پاکستان دنیا دی پہلی 20 معیشتاں اچ شمار ہووݨ دی تیاری کریندا پیا ہئی حالی وی دیر کائنی تھئی، ساریاں جماعتاں رل ٻہن ۔ سینیٹ اجلاس اچ ڳالھ کریندے قائد ایوان سینیٹر اسحاق ڈار آکھیے اے ملک اساں ساریں دا ہے ، اساں ساریں ہی اینکوں بچاوݨا اے ، ہݨ ڳالھ ناراضگی توں اڳوں ودھ ڳئی اے ، اساکوں رل ٻہہ تے مستقبل دا لائحہ عمل تیار کرݨا ہو سی۔ انھاں آکھیے بلوچستان اچ گزریل ݙینھ جیڑھا کجھ تھئے ایں تے ہرپاکستانی کوں ݙکھ اے ، بلوچستان اساں ساریں دے دل دے ٻہوں نیڑے ہے ، اڄ وفاقی کابینہ اچ وی ایں تے تفصیلی ڳالھ تھئی اے ، وختی وزیراعظم بلوچستان ویسن جݙاں جو وزیر داخلہ بلوچستان پڄ چکن ، بلوچستان اچ جیڑھا کجھ وی تھئے افسوس ناک اے ، ریاست پاکستان کوں منݨ آلیں نال مذاکرات تھی سڳدن ، انھاں آکھیے پہاڑاں تے چڑھ تے بے گناہ لوکاں کوں مارݨ آلیں دی شدید مذمت کریندوں، اساں ہر صورت دہشت گردی کوں منڈھوں مکا تے امن گھن آوݨے ، ماضی اچ اے پی ایس دے بعد وی سیاسی جماعتاں رل ٻہہ تے دہشت گردی مکاوݨ دا تہیہ کیتا ہئی، ماضی اچ آپریشن ضرب عضب، آپریشن رد الفساد کامیابی نال تھئن ، اساں انھاں آپریشنز سانڳے سو ارب روپے سالانہ ݙتے جیڑھا درست اقدام ہئی ۔ انہاں آکھیے ول ماضی دے دور اچ بھڄے ہوئے دہشت گرداں کوں واپس گھن آیا ڳیا ، اے فیصلہ تباہ کن ہئی جیں دے نتیجے اڄ ساݙے سامݨے ہن ، بلوچستان اچ جو کجھ تھئے او ٹھیک کائنی ، پوری قوم ھک مٹھ اے، دہشت گرداں دا منڈھوں صفایا کیتا ویسی جیڑھے وی واقعات اچ ملوث ہن انہاں دے خلاف ریاست سخت توں سخت کارروائی کریسی۔ انہاں آکھیے جیڑھے لوک ناراض ہن انہاں نال ڳالھ تھی سڳدی اے لیکن جے پہاڑاں اچ لُک تے لوکاں تے حملے کریسن تاں ایجھے لوکاں نال کوئی ڳالھ نی تھی سڳدی
.jpg)
