ابو ظهبي -31 ڊسمبر (اي پي پي) گڏيل عرب امارات روس ۽ يوڪرين وچ ۾ جنگي قيدين جي نئين سر ڏي وٺ جي حوالي سان ٽياڪڙي جي ڪوششن جي ڪاميابي جو اعلان ڪيو آهي. پرڏيهي ميڊيا موجب گڏيل عرب امارات جي پرڏيهي وزارت گذريل ڏينهن بيان ۾ ٻڌايو ته ڪل 300 قيدين جي مٽا سٽا ڪئي وئي جنهن ۾ يوڪرين جا 150 ۽ روس جا 150 قيدي شامل آهن. گڏيل عرب امارات جي ٽياڪڙي جي ڪوششن ذريعي روس يوڪرين جي قيدين جي ڏي وٺ جو انگ 2484 تائين ٿي ويو آهي. وزارت يو اي اي جي ٽياڪڙي جي ڪوششن ۾ سهڪار لاءِ ٻنهي ملڪن جي تعريف ڪئي. اهي ڪوششون هڪ قابل اعتماد ٽياڪڙ طور گڏيل عرب امارات جي موقف کي ظاهر ڪن ٿيون. بيان ۾ عرب امارات پاران يوڪرين تڪرار جو پر امن حل ڳولڻ لاِ سموريون ڪوششون جاري رکڻ جي عزم جو ورجاءُ پڻ ڪيو.
