لاہور۔5 اکتوبر(اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیے جو پاکستان کوں ترقی دے رستے تے ڳامزن کرݨ کیتے پالیسیاں وچ تسلسل تے اصلاحات تے مستقل مزاجی نال عمل درآمد ضروری اے، جے اساں گھٹ توں گھٹ ݙاہ سال تئیں پالیسیاں دا تسلسل برقرار رکھوں تے تعلیم دے ودھارے تے پوری توجہ ݙیوں تاں پاکستان دنیا دی ترقی یافتہ قوماں دی صف وچ شامل تھی سڳدے، وزیراعظم محمد شہباز شریف دی قیادت وچ “اڑان پاکستان” وژن دے تحت ملک کوں روشن مستقبل دے پاسے گھن تے ونڄݨ دیاں کوششاں جاری ہن۔ اے ڳالھ انہاں مقامی ہوٹل وچ منعقدہ “گلوبل ایجوکیشن کانفرنس و انٹرنیشنل اسکول ایوارڈز” دی تقریب نال خطاب کریندے آکھی ۔ ایں موقع تے ملک توں ممتاز ماہرین تعلیم، تعلیمی اداریں دے سربراہان تے مختلف تعلیمی تنظیماں دے نمائندے دی وݙی تعداد شرکت کیتی۔ پروفیسر احسن اقبال آکھیا جو اڄ دنیا وچ استاداں دا عالمی ݙینھ منایا ویندا پئے، جیندا مقصد استاداں دے عظیم کردار، تعلیمی نظام وچ ہم آہنگی تے تدریسی معیار دی اہمیت کوں اُجاگر کرݨ اے، جتھاں استاد اپݨیاں پیشہ ورانہ ذمہ واریاں کوں چنڳے طریقے نال ادا کریندے پئن، اتھاں معاشرے دے سارے طبقے تے لازم اے جو استاداں دی عزت تے تکریم وچ کہیں وی طور کمی نہ آوݨ ݙیون کیوں جو استاد ہی او ہستی اے جیڑھی قوماں دے مستقبل دی بنیاد رکھیندی اے۔ انہاں آکھیا جو قوماں دی تعمیر و ترقی دا حقیقی رستہ تعلیم توں تھیندے لنڳھدے تے تعلیم ہی غربت مکاوݨ ، روزگار دے موقع وچ ودھارے تے سماجی استحکام دی بنیاد ݙیندی اے۔ وفاقی وزیر آکھیا جو دنیا دا ہر کامیاب شخص اپݨی کامیابی دے پچھوں اپݨے استاداں دی محنت تے رہنمائی کوں محسوس کریندے، والدین انسان کوں دنیا وچ گھن آندن جݙاں جو استاد اینکوں زندگی گزارݨ دا ہنر سکھیندے، میکوں جیہڑھا وی مقام ملیے ایندے وچ میݙے استاداں دی تربیت تے رہنمائی دا وݙا حصہ شامل اے۔ احسن اقبال آکھیا جو تعلیم کہیں وی ملک دا ساریں توں قیمتی سرمایہ تے وݙا اثاثہ اے، جے پالیسیاں تسلسل نال جاری نہ رہن تاں قوماں ول ول صفر تے آویندن۔ انہاں آکھیا جو اساں قوم دے طور تے ترائے واری معاشی طور تے کریش کر چُکیوں ، ہݨ ٻئی غلطی دی گنجائش کائنی، اساکوں انہاں ملکاں دے ماڈلز توں سکھݨا ہوسی جیڑھے مستقل مزاجی تے سائنسی بنیاداں تے منصوبہ بندی دے ذریعے ترقی حاصل کیتی اے۔ انہاں آکھیا جو جدید تے تحقیقی بنیاداں تے استوار تدریسی نظام ہی کہیں قوم دی انفرادی تے اجتماعی استعداد کار وچ ودھارا کر سڳدے، استاد قوماں دی ذہنی تے فکری تربیت دے معمار ہن، کہیں وی معاشرے دی افرادی قوت دی علمی تے فنی صلاحیتاں دا دارومدار انہاں دے تعلیمی معیار تے تھیندے جیڑھا نکھارݨ وچ استاداں دے کردار دی فیصلہ کن حیثیت اے۔ احسن اقبال ٻیا آکھیے جو استاداں دے حقوق تے فرائض دے تحفظ کیتے نہ صرف قومی بلکہ بین الاقوامی سطح تے وی مربوط کوششاں دی لوڑھ اے تواں جو عالمی سطح تے ایں طبقے کوں ٻیا مؤثر بݨایا ونڃ سڳے تے روشن مستقبل دی مضبوط بنیاد رکھی ونڄ سڳے۔ انہاں ملکاں وچال استاداں دے تبادلے، طلباء دے بین الاقوامی پروگراماں تے مشترکہ تحقیقی منصوبیں دے ودھارے کوں خوش آئند قرار ݙیندے آکھیاجو ایں طرح دے اقدامات نال علمی معیار بلند تے قوماں وچال ہم آہنگی وچ ودھارا تھیسی۔ وفاقی وزیر آکھیا جو انہاں سیاست وچ قدم امن، ترقی تے تعلیم دے منشور دے تحت رکھیا تے اپݨے حلقہ انتخاب نارووال وچ وݙے وݙے جاگیرداراں کوں شکت ݙے تے اے ثابت کیتا جو عوام دی طاقت تعلیم، امن تے ترقی دے بیانیے دے نال اے۔ انہاں آکھیے جو وزیراعظم محمد شہباز شریف دی قیادت وچ اڑان پاکستان دے وژن دے تحت ملک کوں روشن مستقبل دے پاسے گھن ونڄݨ دیاں کوششاں جاری ہن۔ احسن اقبال آکھیا جو وژن 2025 دے تحت حکومت دا ہدف اے جو ملک دے ہر ضلع وچ اعلیٰ تعلیم ہر شہری دی دسترس وچ ہووے۔ نارووال دی مثال ݙیندے انہاں آکھیا جو ماضی وچ اتھاں کوئی یونیورسٹی یا کیمپس موجود کائناں ہئی جیں پاروں ذہین طلباء و طالبات اعلیٰ نمبر گھنݨ دے باوجود گھر ٻہݨ تے مجبور ہن، پر ہݨ ٻہوں نامور یونیورسٹیاں دے کیمپس دے قیام نال ہزاراں طلباء اپݨی علمی پیاس ٻجھیندے پئن ۔ تقریب دے چھیکڑ تے وفاقی وزیر گلوبل ایجوکیشن کانفرنس دے منتظمین کوں مبارخ ݙتی تے چنڳی کارکردگی ݙکھاوݨ آلے تعلیمی اداریں دے سربراہان وچ ایوارڈز ونڈیے۔ ایں موقع تے وائس چانسلر یونیورسٹی آف سائوتھ ایشیا عمران مسعود وفاقی وزیر کوں یادگاری شیلڈ پیش کیتی۔
