پاکستان اتے چین دا سدا بہار سٹریٹجک تعاون اتے ساڄھے داری کوں ٻیا تکڑا کرݨ دا عزم، چینی وزیر خارجہ دا دورہ ݙوطرفہ اعلیٰ سطح رابطیاں دے تسلسل دا حصہ اے، ترجمان دفتر خارجہ

اسلام آباد۔22اگست(اے پی پی)پاکستان اتے چین آپݨی “سدا بہار اسٹریٹجک تعاون تے مبنی سانجھ داری” کوں ݙو طرفہ، علاقائی اتے عالمی تعاون اچ وٹاوݨ دا عزم دوہرائے۔ چین دے وزیر خارجہ وانگ ژی دا دورہ پاکستان ݙوہاں ملکاں وچال اُچی سطح دے رابطیاں دے تسلسل دا حصہ اے تاں جو ساڄھے داری کوں ٻیا تکڑا کریڄے۔ ہفتہ وار پریس بریفنگ اچ ترجمان دفتر خارجہ شفقت علی خان ݙسایا جو چین دے وزیر خارجہ اتے کمیونسٹ پارٹی آف چائنا دے پولیٹیکل بیورو دے رکن وانگ ژی 21 اگست 2025ء کوں پاکستان دے نائب وزیراعظم و وزیر خارجہ سینیٹر محمد اسحاق ڈار دی دعوت تے اسلام آباد دا دورہ کیتے اتے اسلام اباد اچ چھیویں پاکستان-چین وزرائے خارجہ سٹریٹجک ڈائیلاگ دی سانجھی صدارت کیتی۔ انہاں آکھیا جو ݙوہاں فریقاں ݙو طرفہ تعلقات دے سارے پہلواں جیںدے اچ سی پیک دے ݙوجھے مرحلے، تجارتی و اقتصادی تعلقات، کثیرالطرفہ تعاون، عوامی رابطے اتے اہم علاقائی و عالمی معاملیاں تے تفصیلی گالھ مہاڑ کیتی۔ انہاں ݙسیا جو چینی وزیر خارجہ آپݨے دورے اچ صدر آصف علی زرداری، وزیراعظم شہباز شریف اتے آرمی چیف فیلڈ مارشل سید عاصم منیر نال ملاقاتاں کیتن۔ صدر پاکستان نال ملاقات اچ آصف علی زرداری پاکستان دی خودمختاری، علاقائی سالمیت اتے قومی ترقی دی حمایت تے چین دا شکریہ ادا کیتا اتے مسئلہ کشمیر تے چین دے اصولی موقف دی تعریف کیتی۔ انہاں چین-پاکستان اقتصادی راہداری (سی پیک) کوں صدر شی جن پنگ دے بیلٹ اینڈ روڈ انیشی ایٹو دا ہک اہم حصہ قرار ݙتا۔ وزیراعظم شہباز شریف نال ملݨ ویلھے ݙوہاں رہنماواں ہک ݙوجھے دے قومی مفادات تے مکمل حمایت دا اعادہ کیتا۔ وزیراعظم سی پیک دے ݙوجھے مرحلے دے تحت وپار، آئی سی ٹی، زراعت، صنعتی ترقی، معدنیات اتے ݙوجھے شعبیاں اچ تعاون ودھاوݨ دا عزم دوہرائے۔ آرمی چیف فیلڈ مارشل سید عاصم منیر نال ملاقات اچ علاقائی سلامتی، انسداد دہشت گردی اتے دفاعی تعاون تے گالھ مہاڑ تھئی۔ ݙوہاں ملکاں علاقائی اتے عالمی سطح تے ہم آہنگی کوں مضبوط بݨاوݨ تے اتفاق کیتے۔ ترجمان آکھیا جو پاکستان، چین اتے افغانستان دے وزرائے خارجہ دی چھویں ترائے ملکاں دی ملاقات 20 اگست 2025 کوں کابل اچ تھئی جیندے اچ پاکستان دے نائب وزیراعظم و وزیر خارجہ اسحاق ڈار، چین دے وزیر خارجہ وانگ ژی اتے افغانستان دے قائم مقام وزیر خارجہ مولوی امیر خان متقی شرکت کیتی۔ انہاں آکھیا جو تریئے فریقاں انسداد دہشت گردی اچ تعاون ودھاوݨ اتے وپار، ٹرانزٹ، صحت، تعلیم، ثقافت، منشیات دی سمگلنگ روکݨ اتے سی پیک کوں افغانستان تئیں ودھاوݨ تے اتفاق کیتا۔ انہاں ݙسیا جو ایں موقع تے اسحاق ڈار مولوی متقی نال ݙو طرفہ ملاقات اچ سیاسی و اقتصادی پیشرفت دی تعریف کیتی ٻھل انسداد دہشت گردی اچ ناکافی تعاون تے چنتا کیتے۔ ترجمان آکھیا جو اسحاق ڈار 17 توں 19 اگست 2025ء کوں برطانیہ دا سرکاری دورہ کیتے، جتھاں انہاں مڈل ایسٹ، افغانستان اتے پاکستان کیتے برطانوی پارلیمانی انڈر سیکرٹری ہمش فولکنر، کئی برطانوی ارکان پارلیمنٹ، لارڈ قربان حسین اتے کشمیری کمیونٹی دے رہنماواں اتے کامن ویلتھ دی سیکریٹری جنرل بیرونس شرلی بوٹچوے نال ملاقات کیتی۔ بیرونس پاکستان دے دورے دی دعوت قبول کیتی۔ اسحاق ڈار لندن اچ پاکستانی ہائی کمیشن اچ ڈیجیٹل زمین ریکارڈ سروسز اتے ون ونڈو پاسپورٹ نظام دا افتتاح وی کیتا تاں جو پاکستانی کمیونٹی کوں سہولت ݙتی ونڄ سڳے۔ انہاں برٹش پاکستانی وکلاء فورم نال خطاب اچ بھارت دی سندھ طاس معاہدے کوں معطل کرݨ دیاں کوششاں کوں “خطرہ” قرار ݙتا۔ انہاں تصدیق کیتی جو “12 اگست 2025 کوں اسحاق ڈار امریکی محکمہ خارجہ دے انسداد دہشت گردی دے قائم مقام کوآرڈینیٹر گریگوری لو جرفو نال ملاقات کیتی۔ ݙوہاں بی ایل اے، داعش-خراسان اتے ݙوجھے گروہاں دے خطرات نال نبڑݨ دے عزم دا اعادہ کیتا۔” ترجمان امریکہ ولوں بی ایل اے اتے ایںدے مجید بریگیڈ گروپ کوں دہشت گرد تنظیماں قرار ݙیوݨ دے فیصلے دا خیر مقدم کیتا اتے آکھیا جو اے پاکستان دیاں قربانیاں اتے عالمی سلامتی کیتے انسداد دہشت گردی دیاں کوششاں دا اعتراف اے۔ پاکستان اتے چین 18 اگست کوں بیجنگ اچ اسلحے دے کنٹرول، عدم پھیلائو اتے تخفیف اسلحہ تے 10 ویں ݙو طرفہ مشاورت کیتی۔ پاکستان دی قیادت وزارت خارجہ دے ایڈیشنل سیکرٹری طاہر اندرابی اتے چین ولوں سن شیائوبو کیتی۔ ݙوہاں فریقاں عالمی و علاقائی سلامتی، جنوبی ایشیا اچ سٹریٹجک استحکام اتے جوہری ٹیکنالوجی و خلا دے پرامن استعمال تے گالھ مہاڑ کیتی۔ آندی مشاورت 2026ء اچ پاکستان اچ تھیسی۔ انہاں ݙسیا جو 8 اگست 2025ء دے ایں فیصلے دا خیر مقدم کیتے جیںدے اچ سندھ طاس معاہدے تے ثالثی عدالت پاکستان دے موقف کوں قبول کیتے اتے بھارت ولوں معاہدے دی خلاف ورزی دی کوششاں کوں مسترد کر ݙتا۔ انہاں آکھیا جو اے فیصلہ معاہدے دی حتمی اتے لازمی نوعیت دی توثیق کریندے اتے بھارت دیاں یک طرفہ کوششاں کوں بے نقاب کریندے۔ ترجمان اسرائیلی بیانات دی سخت مذمت کیتی جیندے اچ “گریٹر اسرائیل” بݨاوݨ اتے فلسطینیاں کوں غزہ توں بے دخل کرݨ دا آکھیا ڳئے۔ انہاں آکھیا جو “اینجھے بیانات بین الاقوامی قوانین اتے اقوام متحدہ دیاں قرارداداں دی کھلی خلاف ورزی ہین۔ ترجمان دفتر خارجہ آکھیا جو پاکستان بھارت دے بے بنیاد الزامات کوں مسترد کریندے، بھارت دا نیوکلیئر بلیک میلنگ دا بیانیہ ہک گمراہ کن، خود ساختہ مفروضہ اے جیںدا مقصد پاکستان کوں بدنام کرݨ اے، پاکستان ہک ذمے وار ایٹمی ریاست اے جیںدا کمانڈ اینڈ کنٹرول مکمل طور تے سویلین نگرانی اچ اے اتے ہمیشہ برداشت اتے ذمے واری ݙکھائی اے۔ انہاں اکھیا جو پاکستان دیاں انسداد دہشت گردی دیاں کوششاں کوں عالمی سطح تے منیا ویندے اتے پاکستانی سکیورٹی فورسز نہ صرف ملک ٻھل خطے اتے دنیا کیتے دہشت گردی دے خلاف ڈھال رہین۔ انہاں بھارت تے تنقید کریندے آکھیا ڄݙاں وی حقائق سامݨے آندن، بھارت اشتعال انگیزی اتے جنگی بیانات دا سہارا گھندے، ݙوجھیاں طاقتاں کوں بھارت دے پروپیگنڈے اچ شامل کرݨ دیاں کوششاں بے فائدہ ہن، پاکستان بین الاقوامی برادری دا ہک ذمے وار رکن ہوݨ پاروں آپݨے کردار کوں جاری رکھیسی ڄیکر بھارت کوئی وی جارہانہ قدم چاتا یا پاکستان دی خودمختاری دی خلاف ورزی کیتی تاں ایںدا فوری اتے بھرپور جواب ݙتا ویسی، کہیں وی کشیدگی دی ذمے واری بھارتی قیادت تے ہوسی، بھارت کوں اشتعال انگیز بیانات ݙیوݨ دے بجائے آپݨے بین الاقوامی فرض پورے کرݨ تے توجہ ݙیوݨی چاہیدی اے، خاص کر علاقائی امن، انسداد دہشت گردی اتے سندھ طاس معاہدے، ڄھیں عالمی معاہدیاں تے عمل درآمد دے حوالے نال ذمے واری دا مظاہرہ کرݨا چاہیدے۔