کوالالمپور۔6اکتوبر (اے پی پی) وزیراعظم محمد شہباز شریف آکھیا جو پاکستان اتے ملائیشیا وچال مضبوط تعلقات کوں پائیدار سانجھے داری اچ بدلݨ چاہندوں، کاروباری روابط ݙوہیں ملکاں دے فیدے اچ ہن، مختلف شعبیاں اچ تعاون کوں ٻیا فروغ ݙیوݨا پوسی، نجی شعبہ ایں سلسلے اچ اہم کردار ادا کر سڳدے۔ اے ڳالھیں انہاں سنوار کوں ’’پاکستان ملائیشیا بزنس اینڈ انوسٹمنٹ‘‘ کانفرنس توں خطاب کریندیں ہوئیں کیتی۔ ایں موقع تے ملائیشیا دے وزیراعظم انور ابراہیم وی موجود ہن۔وزیراعظم آکھیا جو پاکستان اتے ملائیشیا وچال مضبوط گہرے اتے برادرانہ تعلقات ہن جو ݙہاکیاں تے محیط ہن، وزیراعظم انور ابراہیم دے نال انتہائی تعمیری ڳالھ مہار تھئی جئیں اچ پاکستان اتے ملائیشیا وچال کاروباری تعلقات کوں فروغ ݙیوݨ تے اتفاق تھیا، انور ابراہیم ݙوہیں ملکاں وچال کاروباری تعلقات کوں ودھاوݨ اچ دلچسپی رکھیندن۔ انہاں آکھیا جو پاکستان دی معیشت دی بنیاد زراعت اے، پاکستان ملائیشیا سودھے کئی ملکاں کوں زرعی مصنوعات برآمد کریندا پئے، پاکستان دی وݙی آبادی نینگریں تے مشتمل اے جنہاں کوں جدید ٹیکنالوجی، مصنوعی ذہانت دے موقعے فراہم ݙے تے مفید شہری بݨایا ونج سڳدے۔ انہاں آکھیا جو پاکستان اچ سیاحت دے شعبے اچ بے پناہ موقعے موجود ہن، گلگت بلتستان، ہنزہ، نانگا پربت اتے کے ٹو سمیت پاکستان دے ٻئے سیاحتی مقام دنیا کیتے وݙی کشش رکھیندن، پاکستان اتے ملائیشیا دی کمپنیاں کوں سیاحت دے فروغ کیتے اشتراک دے موقعیاں توں فیدہ چاوݨا چاہیدے، پاکستان اتے ملائیشیا وچال سیاحت اچ تعاون گیم چینجر ثابت تھیسی۔وزیراعظم آکھیا جو پاکستان اتے ملائیشیا رَل تے خلیجی ملکاں کوں افرادی قوت ݙے سڳدن، ایں سلسلے اچ جوائنٹ وینچرز کیتے ونڄ سڳدن۔ وزیراعظم شرکا کوں ݙسیا جو پاکستان دی معیشت بہتری آلے پاسے ویندی پئی اے، مہنگائی اتے پالیسی ریٹ اچ نمایاں ڳھٹکی تھئی اے، آندے ݙو سالاں اچ آئی ایم ایف پروگرام دی لوڑھ نہ راہسی، پاکستان اتے ملائیشیا رَل تے اڳوں ودھن تاں آئی ایم ایف کوں خدا حافظ آکھ سڳدن۔ وزیراعظم انور ابراہیم دی دور اندیش قیادت کوں سراہیا اتے آکھیا جو انہاں دی قیادت اچ ملائیشیا نمایاں ترقی کیتی اے، او کاروبار کوں سمجھدن اتے ݙوہیں ملکاں دے کاروباری تعلقات اچ کلیدی کردار ادا کر سڳدن۔وزیراعظم آکھیا جو پاکستان اتے ملائیشیا وچال مضبوط تعلقات کوں پائیدار شراکت داری اچ بدلݨ دے خواہشمند ہن، پاکستان اتے ملائیشیا وچال مضبوط گہرے اتے برادرانہ تعلقات ہن، اساں کوں مختلف شعبیاں اچ تعاون کوں مزید فروغ ݙیوݨا پوسی، ݙوہیں ملکاں وچال آئی ٹی، الیکٹرانکس، تیل تے گیس وغیرہ سودھے ٻئے شعبیاں اچ تعاون دے موقعے موجود ہن۔ وزیراعظم آکھیا جو پاکستان کھیر اتے کَپاہ دی پیداوار دے لحاظ نال دنیا دا پنجواں وݙا اتے اَمب دی پیداوار دے لحاظ نال دنیا دا چوتھا وݙا ملک اے، پاکستانی اَمب انتہائی اعلیٰ معیار دا اے، پاکستانی پھلیں اتے سبزیاں اتے انہاں توں تیار مصنوعات دی بین الاقوامی منڈیاں اچ وݙی مانگ تھی سڳدی اے۔ انہاں لائیو سٹاک دے انتہائی اہم شعبے دا ذکر کریندیں ہوئیں وزیراعظم انور ابراہیم دا پاکستان توں ملائیشیا کیتے حلال گوشت دا کوٹہ 200 ملین ڈالر تئیں ودھاوݨ تے شکریہ ادا کیتا اتے آکھیا جو پاکستان ایں حوالے نال آپݨے وعدے پورے کریسی۔وزیراعظم آکھیا جو حکومت ملک اچ کاروبار کیتے سازگار ماحول فراہم کریندی پئی اے، بلوچستان اچ ریکو ڈک سمیت معدنیات دے شعبے اچ سرمایہ کاری دے پرکشش موقعیاں توں ملائیشیا دی ہنرمند افرادی قوت کوں فائدہ چاوݨا چاہیدے، ملائیشیا دی کمپنیاں پاکستان دے ذریعے خلیجی ملکاں دی منڈیاں تئیں وی رسائی حاصل کر سڳدن۔ انہاں آکھیا جو پاکستان اتے ملائیشیا وچال کاروباری روابط ݙوہیں ملکاں دے مفاد اچ ہن۔ وزیراعظم آکھیا جو حکومتاں دا کاروبار دوست ماحول دی فراہمی اتے سہولت پیدا کرݨ اچ اہم کردار ہوندے لیکن نجی شعبے کوں اڳوں آوݨا پوسی، ݙوہیں ملکاں دے کاروباری طبقے وچال جوائنٹ وینچرز اتے بی ٹو بی پارٹنرشپ اتے ٹیکنالوجی دے اشتراک نال ݙوہیں ملکاں کوں فیدہ تھیسی۔ایں موقع تے ملائیشیا دے وزیراعظم انور ابراہیم آکھیا جو پاکستان دے نال تجارتی تعلقات ودھاوݨ دے خواہشمند ہن، آسیان دے پلیٹ فارم دے ہیٹھ معاشی ترقی حاصل کیتی ونج سڳدی اے، تجارت دے فروغ نال ای خطہ معاشی آزادی حاصل کر سڳدے، ویلھے دے نال نال آسیان دے رکن ملکاں اچ وادھے دی خواہش اے۔ انہاں آکھیا جو پاکستان اتے ملائیشیا وچال تعاون دے وسیع موقعے موجود ہن، اساں کوں کاروباری اداریاں وچال روابط اتے تعاون ودھاوݨا پوسی، پاکستانی کمپنیاں کیتے ملائیشیا اچ تجارت کیتے دروازے کھلے ہن۔ انہاں آکھیا جو ملائیشیا دے ہزاراں طالب علم پاکستان اچ پڑھدے پئن۔ انہاں بانی پاکستان قائد اعظم محمد علی جناح دے وژن کوں سراہیا اتے آکھیا جو او ہک عظیم رہنما ہن۔ انہاں آکھیا جو ݙو پاسہ تجارت اچ موجود رکاوٹاں کوں پاکستانی ہم منصب دے نال رَل تے دور کریسوں، ݙو پاسہ تعلقات اچ وادھے دی بنیادی وجہ معاشی ترقی دا حصول اے۔ انہاں آکھیا جو آپݨے ملک دی ترقی اچ وزیراعظم شہباز شریف دے وژن اہم کردار ادا کیتے، پاکستان اچ سرمایہ کاری کیتے بھرپور اقدامات کریسوں۔
