لاہور۔27اگست (اے پی پی) صوبائی وزیر اطلاعات عظمیٰ بخاری آکھیے جو پنجاب اچ چھل پاروں کوئی جانی ضیان نی تھیا ، متاثرہ علاقیں دے لوکاں کوں محفوظ جاہ تے منتقل کرݙتا ڳئے، چھل دی صورتحال دی وزیراعلیٰ پنجاب مریم نواز سدھی مانیٹرنگ کریندی پئی اے۔اے ڳالھ انہاں ڈی جی پی آر اچ پریس کانفرنس کریندیں آکھی۔ صوبائی وزیراطلاعات عظمیٰ بخاری آکھیے جو سیالکوٹ اچ 11 سالہ مینھ دا ریکارڈ ترٹے جݙاں جو راوی اچ 38 سال بعد ایجھی چھل دی صورتحال سامݨے آئی اے۔ وزیراعلیٰ جاپان توں واپسی تے جہاز اچ ہی چھل دی صورتحال تے میٹنگ کیتی اتے اڄ وی مختلف اجلاساں دی صدارت کریندی پئی اے۔ انہاں آکھیے جو پنجاب اچ چھل توں کہیں قسم دا جانی ضیان نی تھیا ، متاثرہ علاقے دے لوکاں کوں محفوظ جاہ تے منتقل کرݙتے جݙاں جو فوج دیاں خدمتاں وی منگ ڳھدیاں ڳئن ۔ انہاں مزید آکھیا جوحکومت ہر قسم دی ہنگامی صورتحال کیتے تیار اے، پنجاب اچ اٹے اتے دوائیاں دی کوئی قلت کائنی اتے اٹے دی قیمت ودھاوݨ دی اجازت وی نی ݙتی ڳئی۔ وزیراعلیٰ مریم نواز دے اڄوکے جاپان دے دورے دے حوالے نال ڳالھ مہاڑ کریندیں صوبائی وزیر عظمیٰ بخاری ݙسایا جو دورہ جاپان حکومت دی دعوت تے کیتا ڳیا ہئی جتھاں مختلف شعبیں اچ سرمایہ کاری تے ڳالھ تھئی اتے کمپنیاں دے نال معاہدے کیتے ڳئے، جاپانی کمپنیاں پنجاب اچ فٹ بال، گارمنٹس اتے ہوزری دے شعبیں اچ سرمایہ کاری تے رضا مندی ظاہر کیتی اے جݙاں جو ہنڈا کمپنی آپݨے پلانٹ اچ توسیع کریسی جیں نال روزگار دے موقع اچ ودھارا تھیسی۔ صوبائی وزیر تعمیرات و مواصلات ملک صہیب احمد برتھ آکھیا جو جاپان انسٹیٹیوٹ آف میڈیسن سودھے مختلف اداریں دے دورے کیتے ڳئے اتے سرمایہ کاری دے منصوبے پلان دے مطابق شروع تھیسن۔ صوبائی وزیر بلدیات ذیشان رفیق آکھیا جو سُتھرا پنجاب ہک منفرد پروگرام اے جیں دے تحت صوبے اچ روزانہ 50 ہزار ٹن کوڑا چاتا ویندا پئے، جاپان سالڈ ویسٹ توں بجلی بݨیندا پئے، وزیراعلیٰ مریم نواز جاپان اچ ویسٹ ٹو انرجی اتے واٹر ٹریٹمنٹ پلانٹس دا وی معائنہ کیتے۔ انہاں آکھیا جو پنجاب دے 13 شہراں اچ ویسٹ واٹر ٹریٹمنٹ تے کم جاری اے اتے کوڑے توں بجلی و بائیو فیول بݨاوݨ دے منصوبے تے عمل شروع تھیسی۔
